Որոշ երկրներում, գրպանում 20 դոլար ունենալով, կարող ես քեզ հարուստ զգալ, իսկ մյուսներում՝ գտնել մի մահճակալ տասըհոգանոց հոսթելային սենյակում և ուտել մի բուտերբրոտ։ Ձեզ ենք ներկայացնում բնակարանի վարձակալության գները աշխարհի տարբեր երկրներում և առաջարկում մի քանի հարմար տարբերակ։
1. Թայլանդ
Թայլանդում կարելի է գտնել շատ մատչելի հյուրանոցներ, եթե ընտրել ոչտուրիստական վայրերը, օրինակ՝ Չուկպհոն քաղաքը (երկրի հարավ)։ Այս վայրը զբոսաշրջիկների շրջանում այնքան էլ հայտնի չէ, այդ պատճառով բնակարանների վարձակալության գներն էլ բարձր չեն։ Օրական 20 դոլարով այստեղ կարող եք համար վերցնել փոքրիկ առողջարանային հյուրանոցում։ Այդ գումարով ձեզ կտրամադրեն ընդարձակ լոգասենյակով և փոքրիկ հյուրասենյակով համար առանձին տնակում (կան նաև երկու համարով տնակներ), որտեղից կբացվի տեսարան դեպի 22 քառակուսի մետր մակերեսով այգին։ Տարածքում կան արևայրուք ընդունելու համար հարմարություններ, բարբեքյուի հատված, անվճար ավտոկայանատեղի և լռություն, իսկ առավոտյան մատուցում են արքայական նախաճաշ։
2. Իտալիա
Իտալիայում 20 դոլարով կարելի է վարձակալել լոգասենյակով, խոհանոցով և ծովի ափին գտնվող բացօթիկով հիանալի ապարտամենտներ Սիրակուզայում, երկտեղանոց համար Պալերմոյի փոքրիկ, ոճային հյուրանոցում, դե, իսկ մեծ քաղաքներում կարող եք ստանալ միայն «կլաուստրոֆոբի երազանք», օրինակ, Հռոմի Տերմինի կայարանից ոչ շատ հեռու գտնվող հյուրանոցում 7 քառակուսի մետր մակերեսով և ընդհանուր լոգասենյակով շատ փոքրիկ համար։
3. Վրաստան
Վրաստանում օրական 20 դոլարով ընտրության հնարավորություն կա, և գինու ու խինկալու փող էլ մնում է։ Այդ գումարով կարելի է ամրագրել հիանալի, ընդարձակ, պատշգամբով ապարտամենտներ Բաթումիում ծովի ափին, Սիգնախիի ապարտամենտները կլինեն գրեթե շքեղ՝ բուխարիով, սեփական բացօթիկով և, նույնիսկ, նարգիլեով։ Թբիլիսիում և Բորժոմիում 20 դոլարով կարելի է ընտրել հյուրանոց կամ հյուրատուն և ընդարձակ ննջասենյակով ու սեփական լոգասենյակով համար։
4. ԱՄԷ
ԱՄԷ-ն թանկ երկիր է։ Նույնիսկ ամենահասարակ ապարտամենտներում բնակության արժեքը սկսվում է օրական 25-30 դոլարից (ցածր սեզոնին)։ Գրպանում ունենալով 20 դոլար՝ կարելի է հույսը դնել միայն հոսթելային սենյակի վրա։ Օրինակ, Շարժայի հոսթելում այդ գումարով ձեզ կառաջարկեն մեկտեղանի մահճակալ չորստեղանի համարում, ընդհանուր լոգասենյակ հարկում և 5 րոպեյվա հեռավորության վրա գտնվող լողափ։
5. Ճապոնիա
Ճապոնիայում օրական 20 դոլարով շատ բան անել չես կարող, բայց դրսում էլ չես մնա։ Տոկիոյում այդ գումարով կարելի է վերցնել մեկտեղանոց մահճակալով, պահատուփով և ընդհանուր լոգասենյակից օգտվելու հնարավորությամբ համար պարկուճային հյուրանոցում, որտեղ կան կանանց և տղամարդկանց համարներ։ Յակուսիմայում կարելի է բնակվել վեցտեղանոց հոսթելային համարում, որի տարածքում կա ընդհանուր բացօթիկ և ցանցաճոճ։ Լոգասենյակը ընդհանուր է։
