Մենք արդեն 1 320 000 000 ենք․ զբոսաշրջիկների թիվն աշխարհում ռեկորդ է գրանցել
Զբոսաշրջային հոսքն աշխարհում աճել է 7%-ով։
Արտերկիր զբոսաշրջային այց 2017 թվականին իրականացրել է ավելի քան 1,3 միլիարդ մարդ։ Այդ արդյունքը ամենաբարձրն է վերջին յոթը տարում։ Տվյալները ներկայացված են Համաշխարհային զբոսաշրջային կազմակերպության (UNWTO) հաշվետվությունում, որը հրապարակվել է երկուշաբթի օրը՝ հունվարի 15-ին։
Համաձայն UNWTO-ի վերջին տվյալների՝ միջազգային զբոսաշրջային ուղևորությունների թիվը անցյալ տարի ավելացել է 7%-ով։ Ընդհանուր առմամբ, իրենց պետության սահմաններից դուրս է մեկնել 1,32 միլիարդ մարդ։ Այդ արդյունքը ամենաբարձրն է 2010 թվականից հետո։
Եվրոպա է այցելել 671 միլիոն օտարերկրացի, ինչը 8%-ով ավելի է մեկ տարի առաջվա ցուցանիշից։ Ամենից շատ հյուրեր ունեցել են հարավում և Միջերկրածովյան երկներում։ Զբոսաշրջային հոսքը Խորվաթիա, Հունաստան, Մոնտենեգրո և Կիպրոս աճել է 13%-ով, Սկանդինավիայի երկրներ՝ 5%-ով։
Ասիա-խաղաղօվկիանոսյան տարածաշրջան 2017 թվականին այցելել է 324 միլիոն զբոսաշրջիկ։ Զբոսաշրջահոսքի ամենազգալի աճը նկատվել է Հարավային Ասիայի երկրներում (10%)՝ Մալդիվներում, Հնդկաստանում և այլուր։
Շուրջ 207 միլիոն հյուր անցյալ տարի ընդունել են Հյուսիսային և Հարավային Ամերիկաները։ Շատ ամերիկյան ուղղություններ գրանցել են օտարերկրյա զբոսաշրջիկների թվի աճ, այդ թվում՝ Կարիբյան ավազանում՝ 4%-ով։
Աֆրիկա այցելել է 62 միլիոն միջազգային զբոսաշրջիկ։ Մերձավոր Արևելքում ևս աճել է մինչև 58 միլիոն, ինչը 5 %-ով ավել է անցյալ տարվա ցուցանիշից։
Ինչպես նշում են Համաշխարհային զբոսաշրջային կազմակերպության փորձագետները՝ 2017 թվականը տուրիզմի առումով առանձնացել է կայուն աճով դեպի շատ ուղղություններ, որոնք նախորդ տարիներին զրկվել էին զբոսաշրջիկներից տարբեր պատճառներով։ Ակնկալվում է, որ միջազգային տուրիզմի աճի համար ներկայիս ուժեղ խթանը կշարունակվի 2018 թվականին ևս։