Իսպանական Լա-Ռոկա-դել-Վալես փոքրիկ քաղաքում՝ Բարսելոնից ընդամենը կես ժամ հեռավորության վրա, բացվել է աշխարհում առաջին ջրաշխարհը շների համար: Canino Can Jane անվանումով առողջարանը չորքոտանի հյուրերին առաջարկում է բլրակներով լողավազան, տարբեր մակարդակի «աստղային» հյուրանոցային համարներ և անգամ շների համար ՍՊԱ սրահ:
Ջրաշխարում ստեղծվել են բոլոր պայմանները, որպեսզի կենդանիները չձանձրանան. կենդանիների համար լողավազանում պատրաստել են տարբեր խաղեր փչովի ներքնակներով, գնդակներով և այլ խաղալիքներով: Մեկ օրվա մուտքի տոմսի արժեքը կազմում է 15-ից 45 եվր՝ կախված ընտրած ծառայությունից: Եթե տերերը ցանկանում են իրենց շանը թողնել հյուրանոցային համարում մեկ գիշերով, ապա պետք է հավելյալ վճարեն:
Համարի մինիմալ արժեքը կազմում է 25 եվրո: Շների առողջարանը բաց է երկուշաբթիից ուրբաթ օրերին ժամը 9:00-ից մինչև 13:00-ն և 16:00-ից մինչև 19:30-ն: Հանգստյան և տոն օրերին՝ 9:00-ից մինչև 13:00-ն: Հարմարավետության համար առողջարանի սեփականատերերը իրականացնում են կենդանիների փոխադրում առողջարան և հակառակը: