«Հայռուսգազարդ» ընկերության Ծաղկաձորի «Ադիգազ» հանգստյան տունը այսուհետ կոչվում է «Tsaghkadzor Marriott Hotel» եւ մոտ ապագայում պաշտոնապես կբացի իր դռները:
«Հայռուսգազարդ»-ը որոշեց վերակառուցել «Ադիգազ»-ը 2011թ. գարնանը եւ մտադրությունների մասին հուշագիր կքնեց Marriott ցանցի հետ: Ս.թ. օգոստոսին «ՀայՌուսգազարդ»-ի տնօրինությունը եւ Marriott International Inc ընկերությունը պայմանագիր կնքեցին այն մասին, որ «Ադիգազ» հանգստյան տան կառավարումը կանցնի Marriott ընկերությանը:
Հյուրանոցի սեփականատերը «Հայռուսգազարդն» է, իսկ կառավարումն իրականացվելու է Marriott ընկերության կողմից` 30 տարի ժամկետով կնքված պայմանագրի հիման վրա:
Նախագիծը կյանքի է կոչվել «Գազպրոմ» ընկերության գործուն եւ իրական աջակցության արդյունքում:
Հյուրանոցային համալիրի հիմնական շենքում կան 65 համարներ, ինչպես նաեւ 7 քոթեջներ` յուրաքանչյուրում 5-ական սենյակ: Հյուրանոցի տարածքում կան մանկական, ինչպես նաեւ հանդիսությունների ու հանդիպումների համար նախատեսված սրահներ, ռեստորաններ, սրճարան, թեյարան, բարեր, լողավազան: Կառույցի ներսում կգործեն 2 խանութներ, իսկ դրսում կան թենիսի կորտ, մինի-ֆուտբոլի եւ բասկետբոլի դաշտեր:
Հյուրանոցին կից կառուցվել է նաեւ մեկ այլ մասնաշենք, որտեղ լինելու է խաղատուն, ռեստորան, բար եւ դիսկոտեկ: Այս մասնաշենքը տնօրինվելու է ոչ թե Marriott-ի, այլ «Հայռուսգազարդ»-ի կողմից:
Հյուրանոցի բոլոր համարներն ապահովված են Wi-Fi կապով, որի համար Հրազդանից Ծաղկաձոր առանձնացված ինտերնետային մալուխ է բերվել: Բոլոր սենյակները ապահովված են նաեւ արբանյակային հեռուստատեսությամբ եւ միջազգային հեռախոսակապով:
Ամբողջական նյութը տես MediaMax.am-ում
Տեքստը` Մարիամ Մանոյան
Լուսանկարները` Էմին Արիստակեսյան
MediaMax.am