Կարո՞ղ եք պատկերացնել Փարիզն առանց հայտնի «Բույաբեսի», իսկ Վիետնամն առանց «Բան Միի»։ Սնունդը ճանապարհորդության անբաժանելի մասն է կազմում, որը թույլ է տալիս մուտք գործել նոր երկրի մշակույթ։
Dreamlines կռուիզային պորտալը մեզ է ներկայացնում 5 ազգային ուտեստների ցանկ, որոնք անպայման պետք է համտեսել ճանապարհորդելիս։
1. «Ֆրանցեզինա», Պորտուգալիա
Չնայած իր բավականին սովորական տեսքին՝ «ֆրանցեզինան» համարվում է կարևոր ուտեստ և ընդգրկված է աշխարհի լավագույն բուտերբրոտների ցանկում։ Այն Պորտուգալիայում հայտնվել է անցյալ դարի 60-ական թվականներին․ այն վերցրել են Ֆրանսիայից, այդ պատճառով էլ թարգմանվում է որպես «փոքրիկ ֆրանսուհի»։
Համեղ և հագեցնող բուտերբրոտը բաղկացած է երկու կտոր սպիտակ հացից, որոնց միջև գտնվում են հյութեղ միս, խոզապուխտ, ծխեցրած երշիկ, բեկոն և միջին եփված սթեյք։ Այնուհետև այս մսային «ռումբը» ծածկվում է հալվող պանիրով և հայտնվում գարեջրով պատրաստված լոլիկի մածուկի մեջ։
2. «Կալսոտադա», Իսպանիա
Բարսելոնայում դուք, թերևս, չցանկանաք համտեսել պաելիա և սանգրիա։ Այդ ուտեստները կուլտային են համարվում Իսպանիայում, բայց դրանք կատալոնացիների տիպիկ ուտեստները չեն։ Եթե ցանկանում եք ձեզ համար բացել այդ տարածաշրջանի իսկական խոհարարական ավանդույթները, անպայման համտեսեք խորովածով «Կալսոտադա»։
Ամեն տարի նոյեմբերից մարտ ընկած ժամանակահատվածում տեղաբնակները հավաքվում են ընկերների և ընտանիքի հետ, որպեսզի ուտեն սեզոնային սոխուկները (calcots), որոնք տապակում են բարձր կրակի վրա և մատուցում հատուկ սոուսով, որը պատրաստված է լոլիկի մածուկից, կարմիր տաքդեղից և ընկույզից։ Այդ ճաշը դուք երկար կհիշեք։
3. «Բույաբես», Ֆրանսիա
Սկզբում այս ուտեստը պատրաստում էին մարսելցի ձկնորսները՝ եփելով կամբալայի միսը, որը չէին կարողանում վաճառել շուկայում։ Վերջին տարիներին ավանդական «Բույաբեսը» վերածվեց նրբահամ ուտեստի, որում հավաքված են Միջերկրական ծովի լավագույն ձկնատեսակները։
Իսկական «Բույաբեսը» պատրաստվում է երկու փուլով։ Սկզբում եփվում է սխտորից, ձիթայուղից, զաֆրանից, լոլիկից, ուրցից և այլ կանաչիներից բաղկացած արգանակը։ Այնուհետև, դրա մեջ ավելացվում են տարբեր ձկնատեսակներ։ Կախված նրանից, թե ինչ ձկներով է այն պատրաստված, ուտեստի գինը ևս տարբերվում է։
4. «Ակարաժե», Բրազիլիա
«Ակարաժեն» կարևոր արարողակարգային ուտեստ է, որը կիրառվում է աֆրո-բրազիլական կրոնական ավանդույթներում։ Այն կարելի է գտնել միայն Սալվադոր քաղաքում։
Ի՞նչ է իրենից ներկայացնում «Ակարաժեն»։ Այն մաքրած մաշ է, որը արմավենու յուղի մեջ տապակում են մինչև ոսկեգույն դառնալը։ Այն մատուցում են տապակած ծովախեցգետնի, լոլիկի աղցանի և «վատաբայի» (ծովախեցգետնի մածուկ) հետ։ Այս ուտեստը ոչ միայն շատ համեղ է, այլև՝ մատչելի։ Այն կարժենա 1 USD։
5. «Բան Մի», Վիետնամ
Վիետնամում անպայման համտեսեք Բան Մի՝ բագետ, որը հիշեցնում է նախկին ֆրանսիական գաղութի մասին։ Հայտնի շեֆ խոհարար Էնթոնի Բուրդենի բնութագրմամբ՝ «սիմֆոնիան բուտերբրոդում»՝ տիպիկ վիետնամական ուտեստը բաղկացած է բագետից, որը լցոնած է տապակած հյութեղ խոզի մսով, լյարդի պաշտետով, թարմ համեմով և բանջարեղեններով (վարունգ, գազար և դայկոն)։ Հոշիմինի բանուկ փողոցների գրեթե բոլոր կրպակներում դուք կգտնեք այս ուտեստը և չեք հիասթափվի։
