2011 թվականին Լուվր են այցելել 8.8 միլիոն մարդ: Այդպիսով, այն հաճախելիության նոր ռեկորդ է սահմանել (2008-2010 թվականներին Լուվրը ընդունել է 8.5 միլիոն մարդ) և պահպանել աշխարհի ամենաճանաչված թանգարանի իր կոչումը:
Ինչպես հայտնում է Lenta.ru-ն` հղում անելով AFP-ին, Լուվրի այցելուների 66%-ը կազմում են օտարերկրյա զբոսաշրջիկները, առաջին հերթին ԱՄՆ-ից, Բրազիլիայից, Իտալիայից, Ավստրալիայից և Չինաստանից: «Մենք ուրախությամբ փաստում ենք մեր թանգարանի հանդեպ ամերիկացիների հետաքրքրության վերադարձը , ինչպես նաև` զարգացող երկրների զբոսաշրջիկների թվի աճը», – ասվում է թանգարանի վարչակազմի տարածած հայտարարությունում:
Լուվրը տարիների ընթացքում գլխավորում է The Art Newspaper (TAN) պարբերականի առաջարկած աշխարհի ամենաշատ այցելվող թանգարանների ցուցակը: 2010 թվականին այս ցուցակի երկրորդ տեղն էր զբաղեցնում բրիտանական թանգարանը` 5.8 միլիոն այցելուներով, երրորդ տեղում Նյու Յորքի Մետրոպոլիտեն թանգարանն է, որտեղ այցելել են 5.2 միլիոն զբոսաշրջիկ:
