Մալայզիան ճանաչվել է ամենամատչելի ավիաթռիչքով երկիրն աշխարհում՝ ըստ տուրիստական Kiwi.com ծառայության։ Այդ մասին հայտնել է կազմակերպության կայքը․ գրում է Lenta-ն։
Ներքին և միջազգային չվերթներով ճանապարհորդության միջին արժեքը Մալայզիայում կազմում է 4,18 դոլար 100 կիլոմետրի համար։ Երկրորդ տեղում հայտնվել է Բուլղարիան՝ 4,65 դոլար արդյունքով։
Հնդկաստանը եզրափակել է եռյակը։ Այստեղ 100 կիլոմետրը ուղևորին կարժենա 4,96 դոլար։ Չորրորդ տեղում հայտնվել է Թուրքիան, հինգերորդում՝ Ռումինիան (6,46 դոլար)։
Վարկանիշային աղյուսակում ընդհանուր առմամբ հայտնվել է 80 երկիր։ Ռուսաստանը զբաղեցրել է 14-րդ տեղը՝ 7,6 դոլար ցուցանիշով։ Առավել թանկարժեք չվերթներով պետություն է ճանաչվել Բելգիան։ Եվրոպական այս երկրում 100 կիլոմետր թռիչքի համար պետք է վճարել 54,63 դոլար։
Նման վարկանիշային աղյուսակ Kiwi.com-ը ներկայացնում է երկրորդ անգամ։ 2016 թվականի սեպտեմբերին հրապարակված ցուցակում առաջին տեղը զբաղեցրել է Հնդկաստանը։