Բրիտանական ավիաընկերությունը 10-ժամանոց ալբոմ է պատրաստել անքնությամբ տառապողների համար

Բրիտանական բյուջետային  EasyJet ավիաընկերությունը օգոստոսի  11-ին ներկայացրել է 10-ժամանոց Jet Sounds ալբոմը՝ ինքնաթիռի շարժիչի ձայնի ձայնագրությունը, որը պետք է օգնի մարդկանց քնել: Այն տեղադրվել է լոուքոսթերի YouTube-յան ալիքում:

Ավիափոխադրողի ներկայացուցիչները պարզաբանում են, որ ձայնագրությունը արվել է լոնդոնյան Գեթվիկից Նիս կատարած թռիչքի ընթացքում: Այն հասանելի է ներբեռնման համար iTunes-ում, Amazon-ում և Google Play-ում:

Ինչպես գրում է  The Independent թերթը՝ ալբոմը կարելի է գնել  7,99 ֆունտով: Վաճառքից ստացված ամբողջ հասույթը կգնա քնի հետ խնդիրներ ունեցող երեխաների բուժմանը:

Մասնագետները կարծում են, որ ինքնաթիռի շարժիչի ստեղծած սպիտակ աղմուկը դրական է ազդում քնի վրա: Սոմնոլոգ Սանդրա Ուիթլին (Sandra Wheatley) բացատրել է, որ այն փակում է նյարդայնացնող կողմնակի ձայները, որոնք խանգարում են քնել, ինչպես նաև՝ հանգստացնում ուղեղը: