Սինգապուրի օդանավակայանը 6-րդ անգամ ճանաչվել է լավագույնը աշխարհում
Հարցման մասնակիցներին խնդրել են գնահատել 500 օդանավակայան այնպիսի չափանիշներով, ինչպիսիք են՝ թռիչքի համար գրանցվելու հարմարավետությունը, անձնագրային ստուգման տևողությունը, անվտանգությունը, տրանզիտի կազմակերպումը և այլն։
Սինգապուրի Չանգի օդանավակայանը վեցերորդ անգամ անընդմեջ ճանաչվել է լավագույն օդանավակայանն աշխարհում։ Այդ մասին հաղորդվում է՝ հղում տալով Skytrax ընկերության ուսումնասիրությանը։
Հետազոտական ընկերության ղեկավար Էդվարդ Փլեյստիդը արդյունքները անվանել է ֆանտաստիկ, քանի որ Չանգին լավագույնն է ճանաչվում վեցերորդ անգամ անընդմեջ։ Նա նշել է, որ օդանավակայանը գնահատել են «ուղևորների հարմարավետության» և «զանազան նորարարական ապրանքների և ծառայությունների ներդրման» տեսանկյունից։
«Մեզ համար դա մեծ նվաճում է, և մենք կշարունակենք բարելավել օդանավակայանի աշխատանքը»,- հայտարարել է «Չանգիի» գործադիր տնօրեն Լի Սեո Հիանը։
Երկրորդ տեղում հայտնվել է հարավկորեական Սեուլի Ինչհոնը, երրորդում՝ ճապոնական Տոկիոյի Հանեդան։
Հարցմանը մասնակցել է ավելի քան 13,7 միլիոն ուղևոր։