Հայաստանի ազգային պատկերասրահում դեկտեմբերի 15-ից, գործում է Ռոբերտ Ֆալկի ստեղծագործությունների ցուցահանդեսը: Նկարչի ծննդյան 125-ամյակը նշվել է 2011 թ.: Առաջին անգամ համատեղ ներկայացվում են Ռ. Ֆալկի աշխատանքները ՀԱՊ-ի և Ռուսական արվեստի թանգարանի հավաքածուներից: Ցուցադրվում են բազում կատալոգներում և հետազոտություններում լուսաբանված նկարչի առաջնակարգ ստեղծագործությունները, որոնք լավագույնս բացահայտում են վարպետի արվեստի էվոլյուցիան:
Ցուցադրությունը լուսաբանում է Ռոբերտ Ֆալկի ստեղծագործական ուղին` սկսած «Բուբնովի վալետ»-ի վաղ (1910-ական թթ.) և փարիզյան (1928-1937 թթ.) շրջաններից մինչև 1940-50-ական թվականները` վարպետի հասուն շրջանը: Ցուցադրության մեծ մասն են կազմում Ֆալկի գեղանկար հորինվածքները, այդ թվում` «Դաշնամուրի մոտ», 1917 թ., «Սևամորթը. Կրկեսի դերասանը», 1917 թ., նկարչի կնոջ` Ա.Վ. Շչեկին-Կրոտովայի «Սև գլխաշորով», 1948 թ., և «Վարդագույն գլխաշորով», 1958 թ., հայտնի դիմապատկերները, բնանկարներ և նատյուրմորտներ: Ցուցադրվում են նաև մատիտանկարներ և ջրանկարներ, ինչպես նաև Կ. Գոլդոնիի «Ստախոսը» պիեսի ձևավորման էսքիզը (1940): Ազգային պատկերասրահի հավաքածուում գտնվող աշխատանքների մեծ մասը ձեռք է բերվել 1965 թվականին ՀԱՊ-ում կազմակերպված Ռ. Ֆալկի առաջին անհատական ցուցահանդեսից: Դրանք ներառում են նաև նկարչի այրու` Ա. Վ. Շչեկին-Կրոտովայի թանգարանին նվիրաբերած ստեղծագործությունները:
st. Arami 1, 0010 Yerevan, Armenia
(+37410) 567472
www.gallery.am
www.nga.am
http://www.facebook.com/pages/National-Gallery-of-Armenia/142042579140198