British Airways ավիաընկերությունը հարցում է անցկացրել 2000 եվրոպացիների շրջանում, որի նպատակն է եղել պարզել, թե ինչպես են իրենց պահում ուղևորները կարճ թռիչքների ժամանակ: Ինչպես պարզվել է՝ երկար թռիչքների ժամանակ ևս ուղևորների համար կարևոր է հարմարավետ և ոչ պրոբլեմատիկ հարևանները: Հարցման մասնակիցների մեծամասնությունը հայտարարել է, որ նույնիսկ կարճ թռիչքների դեպքում իրենց նյարդայնացնում են աղմկոտ ուղևորները, այդ թվում՝ երեխաները:
Ինչպես նշում է Euromag-ը՝ վրդովվելու պատճառ են հանդիսանում նաև խմիչքն ու ուտելիքը, որոնց համար պետք է վճարել: Գները, որպես կանոն, բարձր են լինում, իսկ ուտելիքի համը՝ սպասվածից վատ: Արդյունքում, բելգիացիների 27%-ը, հոլանդացիների 37%-ը և ֆրանսիացիների 18%-ը իրենց հետ ինքնաթիռ են տանում բուտերբրոտներ: Այն հարցին, թե ինչը կարող է ավելի հաճելի դարձնել թռիչքը, 65%-ը պատասխանել է՝ համացանցի հասանելիությունը, 25%-ը նախապատվությունը տվել է բջջային հեռախոսին: Ընդ որում՝ բջջային հեռախոսով զրույցները բարկացնում են մյուս ուղևորներին:
Ինքնաթիռում սիրելի զբաղմունքների շարքում եվրոպացիները առանձնացրել են զրույցը հարևանի հետ: Ամենաչշփվող են ճանաչվել բելգիացիները. նրանց միայն 18%-ն է սիրում անծանոթների հետ զրուցել ինքնաթիռում: Բելգիացիների մեծամասնությունը՝ 82%-ը, թռիչքի ընթացքում սիրում է կարդալ: Իսկ ամենազրուցասեր ճանաչվել են լեհերը. լեհ զբոսաշրջիկների 37% -ը աշխատում է զրուցել ինքնաթիռի իրենց հարևանի հետ: