Ամենաերկարատև ավիաթռիչքին արագության ռեկորդ են սահմանել

Ամենաերկարատև անտարանցիկ ավիաթռիչքի ժամանակ, որը մարտ ամսից Qantas  ավիաընկերությունը իրականացնում է ավստրալիական Պերտ քաղաքից դեպի Լոնդոն, գերազանցել են արագության սեփական ռեկորդը։ Այդ մասին հայտնում է Lenta-ն՝ հղում կատարելով  Airlines Ratings-ին։

Boeing 787-9 Dreamliner-ով թռիչքի ռեկորդային ժամանակը կազմել է  16 ժամ 29 րոպե՝ թեև, ըստ պլանի, այն պետք է տևեր  17 ժամ  20 րոպե։

Մայիսի 18-ին  Qantas ավիաընկերությունը արդեն արագության ռեկորդ էր գրանցել, բայց հակառակ` Լոնդոն-Պերտ  ուղղությամբ՝ անցնելով 14,5 հազար կիլոմետր ճանապարհը  16 ժամ 35 րոպեում միջին 938 կմ/ժ արագությամբ։

Ավիաընկերության ավագ օդաչու Ալեքս Պասսերինին պատմել է, որ այդ չվերթի գլխավոր դժվարությունը հանդիպակաց քամին է, քանի որ հենց այն է ազդում թռիչքի ժամանակի վրա։