Բուլղարիայի Բալչիկ քաղաքում սկսվում է ծովի երկայնքով երկուկիլոմետրանոց ավազե շերտի շինարարությունը: Նաև նախատեսվում է կառուցել ստորջրյա ալիքի պատնեշ: Ամեն տարի Բալչիկ է այցելում շուրջ 50 000 զբոսաշրջիկ, իսկ լողափները քաղաքում ընդամենը երկուսն են: Այդ պատճառով տեղական կառավարությունը որոշել է մեծացնել քաղաքի առողջարանային հնարավորությունները:
Բալչիկը գտնվում է Բուլղարիայի հյուսիս-արևելքում: Այն երկրի երրորդ խոշորագույն նավահանգիստն է Վառնայից և Բուրգասից հետո. այստեղ ընդունում են միջին չափսի ուղևորատար և բեռնատար նավեր: Քաղաքի տեսարժան վայրերից են բուսաբանական այգին և թագուհի Մարիայի նստավայրը:
Ինչպես հայտնում է Black Sea News-ը՝ սողանքների պատճառով այս տարի ևս զբոսաշրջիկները չեն կարող ոտքով կամ հեծանիվով Բալչիկի ափից հասնել Ալբենա: Արահետի վերականգնման համար անհրաժեշտ է միջոցներ, որոնք կառավարությունը դեռ չի տրամադրել: