Եվրոպական հանձնաժողովը հրապարակել է հետազոտության արդյունքները, որի շրջանակներում կազմվել է ամենաերջանիկ բնակիչներով եվրոպական քաղաքների ցանկը։ Առաջին տեղը բաժին է ընկել Դանիայի Օլբորգ քաղաքին։ Ինչպես նշում է Lenta-ն՝ հղում կատարելով The Independent-ին, վարկանիշային աղյուսակում հայտնվել են, հիմնականում, փոքրիկ քաղաքները, ոչ թե մայրաքաղաքները։
Հարցման ընթացքում մասնակիցներին խնդրել են գնահատել, թե որքանով է իրենց դուր գալիս ապրել այդ քաղաքում, գոհ են արդյոք նրանք ֆիտնես սրահների քանակից և հասանելիությունից կամ քաղաքային տրանսպորտային համակարգից։
Պարզվել է, որ Օլբորգում հարցման մասնակիցների 72 տոկոսը շատ գոհ է այդ քաղաքում իրենց կյանքից, իսկ 24 տոկոսը՝ գոհ է։ Տեղաբնակները հատկապես հպարտ են քաղաքի Օլբորգյան համալսարանով, սեփական սիմֆոնին նվագախմբով և գեղեցիկ ափամերձ գոտով։
Երկրորդ տեղում հայտնվել է Կոպենհագենը։ Այստեղ կյանքից շատ գոհ է հարցվածների 67 տոկոսը, իսկ 28-ը՝ պարզապես գոհ է։ Միայն հինգ տոկոսն է խոստովանել, որ իրենց դուր չի գալիս Դանիայի մայրաքաղաքում ապրելը։
Առաջատարների եռյակը եզրափակում է Ռեյկյավիկը։ Պարզվել է, որ 66 տոկոսը շատ գոհ է, իսկ 31-ը գոհ է Իսլանդիայի խոշորագույն քաղաքի ամեն ինչից։ Հարցման մասնակիցները առանձնացրել են գեղատեսիլ բնապատկերները և շատ հանգիստ, խաղաղ կյանքը։
Ցանկում նաև հայտնվել են Ցյուրիխը, Գրացը, Օսլոն, Վիեննան, Բելֆաստը, Անտվերպենը, Մանչեսթերը և այլ քաղաքներ։
Ավելի վաղ տուրիստական Trivago ծառայությունը անվանել էր Եվրոպայի ամենամատչելի քաղաքների անունները։ Բյուջետային մայրաքաղաքների ցանկի առաջին հորիզոնականում հայտնվել էր Սոֆիան (Բուլղարիա)։ Ամենամատչելի առողջարանային քաղաք ճանաչվել էր Վառնան։