Փորձագետները հաշվարկել են, թե որքանով է թանկ «օլլ ինքլյուզիվը»

Եվրոպական լողափնյա հանգստավայրերում զբոսաշրջիկները ավելի քիչ գումար են ծախսում, եթե ընտրում են  B&B համակարգով հանգիստը, ոչ թե  «ամեն ինչ ներառյալը»։ Այդ մասին գրում է  Daily Mail-ը՝ հղում կատարելով Մեծ Բրիտանիայի Փոստային ծառայության ուսումնասիրությանը։

Post Office Travel Money-ի փորձագետները ուսումնասիրել են Եվրոպայում  10 հայտնի հանգստավայր և համեմատել  B&B (Bed and breakfast) և «ամեն ինչ ներառյալ» համակարգերով հանգիստները։ Առաջին տարբերակը նախատեսում է միայն բնակություն և նախաճաշ, իսկ երկրորդը՝ բնակություն, չորսից հինգ անգամվա սնունդ, խմիչքներ բարում, անիմացիա և այլն։

Բրիտանացի մասնագետները պարզել են, որ տասից 9 հանգստավայրում  B&B հյուրանոցում բնակվող զբոսաշրջիկները ծախսում են ավելի քիչ գումար, այդ թվում՝ այցելելով տեղի ռեստորաններ։

Ամենամեծ տարբերությունը գրանցվել է թուրքական Մարմարիսում։ «Օլլինքլյուզիվ» համակարգով 7-օրյա հանգիստը չորսհոգանոց ընտանիքի համար  կազմել է 2 771,55 ֆունտ։ Իսկ միայն նախաճաշով հյուրանոցում բնակվող ընտանիքը ծախսել է 1 563,38 ֆունտ։ Տարբերությունը զգալի է՝  շուրջ 77%։ Ընդ որում, մասնագետները հաշվել են, որ մեկ շաբաթում ընտանիքը խանութներում և ռեստորաններում ծախսում է ընդամենը  300 ֆունտ։

Ինչ վերաբերվում է մնացած հանգստավայրերին, ապա իտալական Սորրենտոյում «ամեն ինչ ներառյալի» փոխարեն   B&B ընտրող զբոսաշրջիկները կարող են  խնայել  1 064,67 ֆունտ ստերլինգ, պորտուգալական Ալգարվե առողջարանում՝  594,86 ֆունտ, իսպանական Կոստա դել Սոլում՝ 452,88 ֆունտ։ Մալթայի Սլիմա հանգստավայրում, Պաֆոսում, Բուլղարիայի Արևային ափում և իսպանական Կոստա Բլանկայում  «օլլ ինքլյուզիվի» հյուրերը վճարում եմ  10-ից 18% ավել,Կրետեում՝ 7%։ Հետաքրքիր է, որ Մայորկայում  «ամեն ինչ ներառյալ» համակարգը  7,7%-ով շահավետ է B&B-ից։