Դուբայը զեղչային քարտ է թողարկել զբոսաշրջիկների համար

Մայիսի 16-ից Դուբայում (ԱՄԷ) կսկսեն վաճառվել  Dubai Pass զբոսաշրջային քարտերը, որոնց օգնությամբ քաղաքի հյուրերը կարող են զգալիորեն գումար խնայել տեսարժան վայրեր այցելելիս։ Քարտը հնարավորություն է տալիս այցելել քաղաքի 33 առանցքային տեսարժան վայրերը, որոնց թվում են աշխարհի ամենաբարձր  Burj Khalifa երկնաքերը, ժամանցի այգիները, Ski Dubai փակ լեռնադահուկային համալիրը և անապատում սաֆարի տուրերը։ Dubai Pass գնելով` զբոսաշրջիկները նաև կարող են  50-տոկոսանոց զեղչ ստանալ La Perle աքվաթատրոն այցելելու համար։

Ինչպես հայտնում է Ինտերֆաքսը՝ քարտի արժեքը սկսվում է 399 դիրհամից ($109), որով կարելի է այցելել երեք տեսարժան վայր յոթ օրվա ընթացքում, և հասնում մինչև  899 դիրհամի ($245) երեք օր ցանկից ցանկացած վայր անսահմանափակ  այցելելու համար։ Իշխանությունները մտադիր են  2020 թվականին օտարերկրյա զբոսաշրջիկների թիվը հասցնել  20 միլիոնի։