Քաղաքներ, որտեղ ամենաշատն է զբոսաշրջիկների կյանքին վտանգ սպառնում
Կազմվել է աշխարհի 50 ամենավտանգավոր քաղաքների ցանկը ՝ 2015 թվականի տվյալներով։ Դրանցից 41-ը գտնվում են Լատինամերիկյան տարածաշրջանում։
Ցանկի առաջին հորիզոնականը զբաղեցրել է Կարակաս քաղաքը (Վենեսուելա), որտեղ 2015 թվականին 100 հազար մարդու կտրվածքով տեղի է ունեցել 120 սպանություն։ Երկրորդ և երրորդ տեղերում Սան Պեդրո Սուլան է (Հոնդուրաս) և Սան Սալվադորը (Սալվադոր)՝ 100 հազար մարդու կտրվածքով 111 և 108 սպանություն՝ համապատասխանաբար։
Չորրորդ տեղում մեխսիկական Ակապուլկո քաղաքն է (105 սպանություն), որը հայտնվում է ամենավտանգավոր քաղաքների հնգյակում 2011 թվականից սկսած։ Չնայած այդ հանգամանքին՝ քաղաք շարունակում են այցելել բազմաթիվ զբոսաշրջիկներ ինչպես Մեքսիկայից, այնպես էլ՝ այլ երկրներից։ Թոփ-5-ը եզրափակում է Մատուրին (Վենեսուելա)։
Ցանկում հայտնված մյուս մեքսիկական քաղաքներից են Կուլյականը (Սինալոա նահանգ), Տիխուանան (Ներքին Կալիֆորնիա նահանգ), Սյուդադ Վիկտորիան (Տամաուլիպաս) և Սյուդադ Օբրեգոն (Սոնորա)։ Այս անգամ ցանկում չի հայտնվել Սյուդադ Հուարեսը, որը գլխավորել է այն 2008-ից 2010 թվականներին, ինչպես նաև՝ Չիուաուան, Կուերնավական, Նուեվո Լարոդեն և Տորրեոնը։
Վարկանիշային աղյուսակը հրապարակել է Հանրային անվտանգության և քրեական արդարադատության քաղաքացիական խորհուրդը (CCSPJP)։ Ցանկում հայտնվում են 300 հազար մարդուց ավել բնակություն ունեցող քաղաքները։ Սպանությունների մասին տվյալները վերցվում են պաշտոնական աղբյուրներից, որոնք համացանցում հասանելի են բոլորին։