Ֆուտբոլիստ Լիոնել Մեսսին, ով հանդես է գալիս իսպանական «Բարսելոնա» ակումբում, Կատալոնիայի մայրաքաղաքում կբացի սեփական ռեստորանը։ Բարսելոնայի գլխավոր Avenida Diagonal փողոցին մոտ Carrer d’Enric Granados, 86 հասցեում գտնվող հաստատության համասեփականատերեր են դարձել արգենտինացի ֆուտբոլիստի եղբայրը՝ Ռոդրիգո Մեսսին և հայտնի ռեստորատոր Իգլեսիաս եղբայրները։
Հազար քառակուսի մետր մակերեսով Bellavista del Jardin del Norte անունը կրող ռեստորանը կհիշեցնի քաղաքի մանրակերտ՝ իր տներով և փողոցներով։ Յուրահատուկ ձևավորմամբ յուրաքանչյուր սրահում կմատուցվեն տարբեր խոհանոցների ուտեստներ․ գրում է Lenta.ru-ն։ Ռեստորանում հնարավոր կլինի հետևել ֆուտբոլային խաղերին, խաղալ վիդեոխաղեր, կարդալ գրքեր գրադարանում և պարել։ Ռեստորանը կկառավարի միշլենյան խոհարար։ Ներկայումս ռեստորանը անձնակազմ է հավաքում, այնպես որ բացումը սարերի հետևում չէ։