Վրացի խոշոր գործարար Թեմուր Չկոնիան հավանություն է ստացել Հայաստանում McDonald’s բացելու համար, այդ մասին նա հայտնել է Sputnik-ին։
Այն լուրը, որ շատերի կողմից սիրված McDonald’s արագ սննդի ցանցը շուտով մասնաճյուղ կբացի Երևանում, մեծ աղմուկ բարձրացրեց ոչ միայն տեղի բնակչության, հայ գործարարների շրջանում, այլև մամուլում։
Որոշ փորձագետներ և մի շարք հայկական ԶԼՄ-ներ թերահավատությամբ վերաբերվեցին այս նորությանը, սակայն Sputnik Արմենիան հետևում էր իրավիճակի զարգացմանը։
Հայաստանում McDonald’s բացելու հարցը որոշվել է Օռլանդոյում (ԱՄՆ, Ֆլորիդայի նահանգ) McDonald’s ընկերության ներկայացուցիչների հանդիպման շրջանակում։
«Ես ստացել եմ McDonald’s կորպորացիայի գլխամասային գրասենյակի համաձայնությունը` կապված Հայաստանում արագ սննդի ցանց բացելու հետ։ Մնացել է հարցը լուծել Հայաստանի կառավարության հետ։ Մենք 100 տոկոսով համոզված ենք, որ կբացենք McDonald’s։ Դա միայն ժամանակի հարց է»,- Sputnik Արմենիային ասել է Չկոնիան։
McDonald’s-ի շուրջ կրքերը թեժացան այն բանից հետո, երբ վրացի գործարար Թեմուր Չկոնիան հայտնեց, որ մտադիր է McDonald’s բացել։ Միաժամանակ նա մանրամասն նկարագրել է շինության տեսակը և տվյալներ ներկայացրել հայկական շուկայի մասին։
Նրա խոսքով` մեկ McDonald’s կառուցելու համար անհրաժեշտ է 1500 քմ տարածք, իսկ Հայաստանի տարածքում կարելի է կառուցել ցանցի 8 ռեստորան, որտեղ կարող է աշխատել մինչև 30 տարեկան շուրջ 1500 մարդ։
Տեղի գործարարները կասկածում են McDonald’s ցանցի բացմանը։ Չէ՞ որ շատ հայ գործարարներ պայքարել են Հայաստանում McDonald’s բացելու իրավունքի համար։ Անվանի հայ գործարար Խաչատուր Սուքիասյանը կարծում է, որ Հայաստանում առաջիկայում չի կարող իրագործվել նման ծրագիր։
«Ես արդեն ասել եմ, որ Հայաստանում ապրում է շուրջ 3 մլն մարդ, հետևաբար, այստեղ չի կարող լինել հինգից ավել McDonald’s»,- Sputnik Արմենիայի թղթակցի հետ զրույցում ասաց Սուքիասյանը։
Արագ սննդի համակարգը շատ տարածված է Հայաստանում, գործում է մի քանի ցանցեր` «Կարաս», KFC, Gyros։