Բրիտանացի զբոսաշրջիկը բարեգործության շրջանակներում մեկ օրում այցելել է 12 երկիր

Լիդս քաղաքից բրիտանացի զբոսաշրջիկը այցելել է 12 եվրոպական երկիր  24 ժամում՝ գործելով բարեգործության շրջանակներում։ Այս ուղևորությունների ընթացքում նա հավաքել է շուրջ 1,3 հազար եվրո գումար․ հայտնում է  Lenta-ն՝ հղում կատարելով The Daily Mail-ին։

Գործարար Ադամ Լեյտոնը (Adam Leyton) սկսել է իր ճանապարհորդությունը մայիսի  25-ին տեղական ժամանակով առավոտյան յոթին գերմանական Պերլ համայնքից և անցել լյուքսեմբուրգյան հայտնի Շենգեն գյուղով, որը գտնվում է ոչ այնքան հեռու։

Գերմանիայից և Լյուքսեմբուրգից բացի Լեյտոնը մեկ օրվա ընթացքում այցելել է Ֆրանսիա, Բելգիա, Նիդեռլանդներ, Դանիա, Լեհաստան, Չեխիա, Սլովակիա և Հունգարիա։ Իր ճանապարհորդությունը նա ավարտել է Ավստրիայում։

Բրիտանացին իր առջև  պայման է դրել այցելել այս բոլոր երկրները ինքնաթիռներով, ավտոբուսներով, գնացքներով կամ ոտքով․ հենց ոտքով է նա հաղթահարել վերջին երկու կիլոմետրը մինչև Ավստրիայի սահմանը։

Ճանապարհորդի խոսքերով՝ երբ նա հասել է ավստրիական սահմանի այգուն, հիացել է իր ձեռքբերումով։ «Ես լալիս էի, կարծես՝ դա այն էր, ինչ ես մտածում էի ամիսներ շարունակ»,-խոստովանել է Լեյտոնը։

24-ժամյա ուղևորության ընթացքում զբոսաշրջիկը քնել է միայն երկու ժամ Վարշավայից Բրատիսլավ մեկնող  գնացքում։ Ճանապարհորդությունը չի անցել նաև առանց խնդիրների։ Երբ Լեյտոնը փորձել է գնել երկաթգծի տոմս, անհաջողության է մատնվել․ նրան տվել են բջջային հեռախոսահամարի հաշվի վերալիցքավորման քարտ։ Լեյտոնը դա բացատրել է նրանով, որ վատ է խոսում ֆրանսերեն և չի կարողացել հստակ ձևակերպել իր մտքերը  դրամարկղի մոտ։

Իր ուղևորության շնորհիվ՝ բրիտանացին կարողացել է գումար հավաքել բարեգործական հիմնադրամի համար, որն օգնում է այն մարդկանց, որոնց երեխաները մահացել են ծնվելիս, դրանից առաջ կամ հետո։  Այդ դժբախտությունը, մասնավորապես, ապրել է Լեյտոնի քույրը։