Զբոսաշրջային քարտեզից անհետացումից 36 տարի անց Իրանը կարող է վերադառնալ 2016 թվականին։
Ինչպես գրում է news.com.au-ն՝ Իրանի գրավչությունը, որպես զբոսաշրջային ուղղություն, կասկածների տեղիք չի տալիս․ լեռնադահուկային առողջարաններ, ճարտարապետություն, հրաշալի սնունդ և հնէագիտական պեղումների վայրեր․ այս ամենը կարելի է գտնել հին Պարսկաստանում։ Սակայն 1979 թվականի հեղափոխությունից և նախագահ Հասան Ռոուխանի ընտրվելուց հետո արևմտյան զբոսաշրջիկներին խորհուրդ տրվեց խուսափել Իրանից։
Բայց ամեն ինչ կարող է փոխվել արդեն մյուս տարի։ Իրանի պաշտոնյաները Associated Press-ին տված հարցազրույցում հայտարարել են, որ պատրաստվում են «զբոսաշրջային ցունամիի»։ Դեռևս Արևմուտքի կողմից պատժամիջոցներ հանելուց առաջ զբոսաշրջիկների քանակը Իրանում աճել էր 12%-ով վերջին 2 տարիների ընթացքում։ Անցյալ տարի Իրանը ընդունել է 5 միլիոն զբոսաշրջիկի, իսկ 2025 թվականին՝ հույս ունի ընդունել ոչ պակաս, քան 20 միլիոն զբոսաշրջիկի։
Ֆրանսիան և Մեծ Բրիտանիան արդեն հայտարարել են Իրան այցելելու համար իրենց քաղաքացիներին տրվող խորհրդատվության փոփոխության մասին, ինչը կարող է հանգեցնել զբոսաշրջիկների հետաքրքրության աճին։ Իսկ Իրանն արդեն պատրասվում է այդ հոսքին։ Օրերս համաձայնագիր է ստորագրվել Accor Hotels-ի հետ, որը երկու հյուրանոց կկառուցի Իրանում։ Novotel IKIA-ն և Ibis IKIA-ը կբացվեն Իրանում հաջորդ տարի։
