Ամեն տարի ամռանը զբոսաշրջիկները կարող են այցելել Ելիզավետա II-ի նստավայր` Բուքինգեմյան պալատ, երբ Նորին Մեծությունը հանգստանում է Շոտլանդիայում: Սակայն նախկինում այցելուներին ներս էին թողնում կողքի մուտքից, իսկ այս տարի նրանց համար առաջին անգամ բացել են այն դռները, որոնք դուրս են գալիս Վիկտորիա թագուհու հուշարձանի հրապարակ, որտեղից սկիզբ է առնում Մելլ փողոցը:
Սովորաբար գլխավոր մուտքից օգտվում են միայն թագավորական ընտանիքի անդամներն ու նրանց հյուրերը` պետությունների ղեկավարներ, եվրոպացի ազնվականներ, հայտնի մարզիկներ, արտիստներ, տիեզերագնացներ և այլոք:
Այս տարի Բուքինգեմյան պալատում ներկայացված է «Թագավորական ընդունելություն» ցուցահանդեսը. այցելուները կարող են տեսնել ծաղիկներով զարդարված ճաշասենյակը և ընդունելության համար պատրաստ սեղանները, համեղ ճաշացանկը, պալատական խոհանոցը, գինու մառանը, կարի արհեստանոցը, ինչպես նաև` Ելիզավետա II թագուհու հանդիսավոր հագուստը, որոնք նա տարբեր տարիներին նվեր է ստացել. հայտնում է Travel.ru-ն:
Հանրության համար Բուքինգեմյան պալատը բաց կլինի մինչև սեպտեմբերի 27-ը: Մուտքի տոմսի արժեքը կսկսվի 29 եվրոյից: Հյուրերի ընդունելության ժամեր են 9.30-ից 19.30-ը հուլիսի վերջին և օգոստոսին և մինչև 18.30-ը` սեպտեմբերին: Էքսկուրսիան տևում է մոտ երկու ժամ. նշվում է պալատի կայքում:
