Նոր «դանդաղ սննդի» Eataly խոհարարական համալիրը իր դռներն է բացել Ֆլորենցիայում: Ֆլորենցիական Eataly-ն նվիրված է Վերածննդի դարաշրջանի թեմային, այն գտնվում է քաղաքի պատմական կենտրոնում՝ Դուոմոյից մի քանի քայլ հեռավորության վրա, և զբաղեցնում է 2000 քառակուսի մետր տարածքով երեքհարկանի կառույցը, որտեղ մինչև 2010 թվականը տեղակայված է եղել Մարցոկկո գրախանութը:
Ինչպես Իտալիայում արդեն գոյություն ունեցող նմանատիպ կառույցները, այնպես էլ՝ նոր խոհարարական համալիրը առաջնորդվում է Eataly ձևաչափով՝ «գնել, ուտել, սովորել»: Նոր Eataly կենտրոնի բացման արարողությանը մասնակցել է Eataly համակարգի հիմնադիր Օսկար Ֆարինետտին, ինչպես նաև՝ Ֆլորենցիայի քաղաքապետ Մատտեո Ռենցին: Նոր Eataly-ն առաջարկում է բարձրորակ էնոխոհարարական մթերքներ, և բացի դրանցից, ապահովում է աշխատանքով 100 երիտասարդների:
Նոր Eataly-ի առաջին հարկում է գտնվում պաղպաղակ-սրճարանը, մեծ բարը, հրուշակեղենի բաժինը, թեմատիկ ռեստորանների մի ամբողջ տեսականի, ներառյալ՝ ավանդական ֆլորենցիական Լամպրեդոտտո ուտեստին նվիրված թեմատիկ ռեստորանը: Երկրորդ հարկը նախատեսված է գինիների և գարեջրի ապրանքանիշների համար, այստեղ է գտնվում նաև իսկական գուրմանների համար նախատեսված «DaVinci» ռեստորանը: Երրորդ հարկում է թեմատիկ «Eatinerari» (սննդի երթուղիները), «Վերածնունդ» և «Գարեջուր» լսարանները, որտեղ փետրվարից սկսած կանցկացվի երեխաների և մեծահասակների համար նախատեսված սնվելու արվեստին տիրապետելու դասընթացներ: