Թայվանի լողափ է դուրս եկել տեսախցիկ, որը մի զբոսաշրջուհի կորցրել է 2007 թվականին Հավայան կղզիներում: Տեսախցիկը, որը «հաղթահարել է» վեց հազար կիլոմետր ճանապարհ, ծածկված է եղել ջրիմուռներով և խխունջներով, բայց նրա ջրակայուն պատյանը չի վնասվել: Մարտի սկզբին տեսախցիկը գտել է China Airlines ավիաընկերության աշխատակիցը և գտածին շատ լուրջ վերաբերմունք ցուցաբերել:
Նա ոչ միայն դիտել է նկարները, որպեսզի պարզի, թե ով է սեփականատերը, այլև ստեղծել է ինտերնետային էջ, որտեղ առաջարկել է բոլորին պարզել, թե ով է Հավայան տեսարանների ֆոնին լուսանկարված կինը: Այս իրադարձությունը գրավել է նաև հեռուստաընկերությունների և մամուլի ուշադրությունը. հայտնում է Usatoday.com-ը: Արդյունքում զբոսաշրջուհին գտնվել է: Ջորջիա նահանգից ամերիկուհի Լինդսի Սկալանը զարմացել է, երբ ստացել է բազում նամակներ իր գտնված տեսախցիկի մասին:
Նա պատմել է, որ Հավայան կղզիներ այցելել է առաջին անգամ և շատ է վրդովվել, որ այնտեղին լուսանկարներ բերել չի հաջողվել: Բայց տեսախցիկի գտնվելով Լինդսիի հաջողությունը չի սահմանափակվել. China Airlines ավիաընկերությունը հայտարերել է այն մասին, որ կվճարի նրա թռիչքի և Թայվանում բնակության համար, որպեսզի նա գա և վերցնի տեսախցիկը և անձամբ շնորհակալություն հայտնի գտնողին:
