Հնդկաստան. Ակտիվիստները պահանջում են արգելել «մարդկային սաֆարին» Անդամաններում
«Մարդկային սաֆարի» կոչվող տուրերը, որոնք, ըստ էության նվաստացնում են մարդկային արժանապատվությունը, կրկին հասանելի են զբոսաշրջիկների համար` Անդաման կղզիներում Jarawa ցեղի ռեզերվացիայի ճանապարհների բացման հետ կապված: Այն փակ էր Հնդկաստանի Գերագույն դատարանի համապատասխան որոշումից հետո: Jarawa-ն այն քիչ ցեղերից մեկն է, որոնք ապրում են Բենգալյան ծովածոցի կղզիներում և սկսել են հանրության հետ հաղորդակցվել 1998 թվականից: Այժմ ցեղն ունի շուրջ 400 անդամ և չունի բազմաթիվ հիվանդությունների իմունիտետ. հայտնում է The Telegraf-ը:
Survival International-ը պահանջում է արգելել տուրերը, որոնք ավելի շատ նման են սաֆարիի և ցեղի բնակիչների ուսումնասիրման` ինչպես կենդանիներին գազանանոցում, և կրկին փակել ճանապարհը: Ընկերությունը հայտարարում է, որ մասնավոր գիդերը և տաքսու վարորդները տանում են զբոսաշրջիկներին սաֆարի` ներկայացնելով դա` որպես տուր դեպի Բարատանգ կղզի, որտեղ զբոսաշրջիկները կարող են տեսնել կրաքարակերտ քարանձավներ և ցեխոտ հրաբուխներ:
Իրականում բազմաթիվ զբոսաշրջիկների այնտեղ մեկնելու հիմնական պատճառը Jarawa ցեղի բնակիչներին գոնե հեռվից տեսնելն է: Զբոսաշրջիկներն իրենք են հաստատում այդ փաստը: Ինչպես պնդում է Survival International-ը` նրանցից շատերը փորձում են կանչել ցեղի բնակիչներին` ինչպես կենդանիներին կենդանաբանական այգում` առաջարկելով թխվածքաբլիթ կամ քաղցրավենիք: