ՀԱյաստանի կառավարությունն այսօրվա նիստում հավանություն է տվել «Սի Սի Ջի Կովկասյան կոմունիկացիոն խումբ» ընկերության ներկայացրած «Դվին» հյուրանոցային համալիրի վերակառուցման ներդրումային ծրագրին:
«Դվին» հյուրանոցային համալիրը կվերակառուցվի միջազգային չափանիշներին համապատասխան. ներդրումների ընդհանուր ծավալը կկազմի շուրջ $120,6 մլն, որի արդյունքում կստեղծվի 400 նոր աշխատատեղ:
Հյուրանոցային համալիրի վերակառուցման վերջնաժամկետ է սահմանվել 2019թ.:
Հինգաստղանի հյուրանոցային համալիրը ներառելու է բարձրակարգ ռեստորաններ, ակումբներ, խանութներ, բիզնես կենտրոն եւ կոնֆերանս կենտրոն, ՍՊԱ սրահ, լողավազան, ֆիթնես կենտրոն, հանդիսությունների դահլիճներ եւ այլն: Բացի այդ, հյուրանոցի տարածքում նախատեսվում է բարձրակարգ (VIP) խաղատան կազմակերպում՝ համապատասխան լիցենզիայի հիման վրա:
Կառուցվելու են ավտոհանգրվաններ. ստորգետնյա՝ մոտ 330 ավտոկայանատեղիով, եւ վերգետնյա՝ առնվազն 50 ավտոկայանատեղիով:
Նախատեսվում է հյուրանոցային համալիրի ռեբրենդինգի իրականացում եւ նրա վերանվանում՝ «Դավիթ Բեկ» հյուրանոցի:
ՀՀ վարչապետի հանձնարարականով, ընկերությունը պայմանագրով պետք է ամրագրի յուրաքանչյուր տարվա համար նախատեսվող ներդրումների մեծությունը:
Բացի այդ, յուրաքանչյուր տարվա ներդրումների կատարման հիմնավորման նպատակով կազմակերպությունը պետք է նշված ներդրումներն արտացոլի Ֆինանսական հաշվետվությունների միջազգային ստանդարտներին համապատասխան կազմված հաշվետվություններում (IFRS), որոնք պետք է ենթարկվեն արտաքին աուդիտի Աուդիտորական ընկերությունների Մեծ Քառյակի ընկերություններից որեւիցե մեկի կամ «Գրանթ Թորնթոն» ընկերության կողմից:
Վերջինիս կողմից տրված աուդիտորական եզրակացությունը վերոնշյալ հաշվետվությունների հետ մեկտեղ պետք է ներկայացվեն ՀՀ կառավարությանն առընթեր պետական գույքի կառավարման վարչություն:
Վարչապետի խոսքով՝ փաստաթղթերի ձեւակերպման հետ կապված կան որոշ խնդիրներ, որոնք պետք է քննարկվեն համապատասխան նախարարությունների հետ: Աղբյուրը՝ Banks.am