Լուվրի մասնաճյուղը՝ Էմիրություններում, վիդեոխաղերի թանգարան՝ Մեծ Բրիտանիայում, բլյուզի թանգարան՝ ԱՄՆ-ում. առաջարկում ենք ծանոթանալ 2015 թվականին սպասվելիք նոր տեսարժան վայրերին աշխարհի տարբեր կետերում:
Սինգապուրի ազգային պատկերասրահ
Որտե՞ղ՝ Սինգապուր
Ե՞րբ՝ 2015, նոյեմբեր
Հարավարևելյան Ասիայում ամենամեծ գեղարվեստի կենտրոնը կկառուցվի Սինգապուրի Civic District պատմական թաղամասի հենց կենտրոնում: Կառուցվող պատկերասրահի մակերեսը 64 000 քառակուսի մետր է: Ազգային պատկերասրահի հավաքածուն կներառի արվեստի գործեր, որոնք ստեղծվել են Հարավարևելյան Ասիայում XIX դարից մինչև մեր օրեր: Օրինակ, կներկայացվեն մալայզիացի նկարիչ Լատիֆա Մոհիդինի, ֆիլիպինցի Ֆերնանդո Կուետո Ամորսոլոյի և թայլանդցի Մոնտիեն Բունմի աշխատանքները:
Funtasy Island զվարճանքների այգի
Որտե՞ղ՝ Ռիաու կղզի, Ինդոնեզիա
Ե՞րբ՝ 2015-ի վերջ
Աշխարհի ամենամեծ էկո-թեմատիկ պարկը կձգվի 300 հա տարածքում Ռիաու կղզիներում, որոնք գտնվում են Հարավչինական ծովում: Այս նախագծի արժեքը կազմում է $240 միլիոն դոլար: Զվարճանքների ընտրանին խոստանում է լինել տպավորիչ. այգու տարածքում կգործի սնորքլինգի և աքվալանգով լողի գոտիներ, ջրային և ցամաքային սաֆարի, ինտերակտիվ դելֆինարիում և աքվարիում, որտեղ ամենահամարձակ այցելուները կարող են լողալ կետային շնաձկներին գրկախառնված:
Լուվրի մասնաճյուղը Աբու Դաբիում
Որտե՞ղ՝ Աբու Դաբի, ԱՄԷ
Ե՞րբ՝ 2015, դեկտեմբեր
Այն մասին, որ ԱՄԷ-ում կհայտնվի աշխարհահռչակ թանգարանի մասնաճյուղը, հայտնի դարձավ դեռևս 2010 թվականին: Շենքի նախագիծը, որը մտածված է սավառնող գմբեթի տեսքով, ստեղծել է ֆրանսիացի ճարտարապետ Ժան Նուվելը: Լուվրի արաբական մասնաճյուղում կներկայացվեն Էդուարդ Մանեի, Ռենե Մագրիտտի, Օսման Համդի բեյի, Պոլ Գոգենի աշխատանքները: CNN հեռուստաընկերության տվյալներով՝ Աբու Դաբիի կառավարությունը վճարել է $525 միլիոն դոլար թանգարանը Լուվրի հետ ասոցացման իրավունքը ստանալու համար և ներդրել է $747 միլիոն դոլար արվեստի ստեղծագործությունների և մենեջմենթի համար: Շենքի շինարարությունը արժեցել է $100 միլիոն դոլար:
Բլյուզի ազգային թանգարան
Որտե՞ղ՝ Սենտ Լուիս, Միսսուրի, ԱՄՆ
Ե՞րբ՝ 2015-ի վերջ
Բլյուզին նվիրված թանգարանը կբացվի Սենտ Լուիսի կենտրոնում: $13,5 միլիոն դոլար արժողությամբ նախագծին աջակցում են տարբեր հայտնիներ. սկսած՝ լեգենդար բլյուզմեն Բադդի Գայից, մինչև՝ դերասան Ջոն Գուդմանը: Թանգարանի մակերեսը ավելի քան 2000 քառակուսի մետր է, այն կունենա 100 հանդիսատեսի համար կինոթատրոն, համերգային հրապարակ, ինչպես նաև՝ երաժշտության դասարաններ: Ամենահետաքրքիր ինտերակտիվ ցուցանմուշներից մեկը կդառնա Blues Lab-ը (այսինքն՝ բլյուզի լաբորատորիան), որտեղ այցելուները կարող են, օրինակ, ձայնագրություններ անել:
Ապագայի թանգարան
Որտե՞ղ՝ Ռիո դե Ժանեյրո
Ե՞րբ՝ 2015 թվական
Թանգարանի բացման ճշգրիտ օրը, որը նվիրված է ապագայի տարբեր ոլորտներին, ինչպիսիք են, օրինակ, կլիմայի փոփոխության հետևանքները կամ բնակչության կյանքի աճն ու շարունակականությունը, դեռևս հայտնի չէ: Հայտնի է միայն, որ այն տեղի կունենա 2015 թվականին: 30 000 ընդհանուր մակերեսով Ապագայի թանգարանի շենքը նախագծել է հայտնի բրազիլացի ճարտարապետ Սանտյագո Կալատրավան: Այստեղ, բացի ցուցահանդեսային տարածքից, կլինեն նաև այգիներ, լճակ, հեծանվուղի և հանգստի գոտի:
Նյութի առաջին մասին կարող եք ծանոթանալ այստեղ: